يوميات شاب روش طحن........

بصوا بقي دي عبارة عن حلقات
15 حلقه وهي كوميديه و ابطالها وائل و طارق و اصحابه كتله وهيما و الوالد و الوالده و الخال كرم

انا هكتب لو حقله لو عجبتكم هكمل لكم الباقي اوووكش ؟؟؟؟

** الحلقه الاولي **

يدخل الاب الي حجرة ابنه ليوقظه للذهاب للجامعه
الوالد: طارق... طارق ... قوم يا حبيبي
فيفتح الولد عينا واحده ينظر بيها الي ابيه في استغراب وكأن ااباه قد انتهك مقدسا
طارق: ايه يا بابا في ايه ؟
الوالد: قوم يا حبيبي علشان تلحق تروح كليتك؟
طارق:يا بابا كليه ايه اللي بتصحيني علشانها وش الفجر
الوالد: وش الفجر ايه بس ... يابني الساعه داخله ع عشرة ونص .. قوم علشان تلحق محاضراتك
طارق: يا بابا نفض
الوالد:اعمل ايه؟؟
طارق: يعني كبر يا بابا
الوالد: الله اكبر
طارق: لا يا بابا مش قصدي ... انا قصدي كبر دماغك يعني
الوالد: يابني قوم ماتتعبنيش... مش انت عندك محاضرات مهمه النهاردة ؟؟؟؟؟؟
طارق: يا بابا مهمه ايه بس.... دي كليه في الكلتشه
الوالد(متعجبا): يعني ايه كلتشه ...يايني انت مش عندك محاضرات مهمه النهارده؟
طارق: يا بابا ... فكك من كلام الستينات ده ...انا مش قادر افك رموز وشي
الوالد: يابني قوم اخوك بيقول ان المحاضرات عندك مهمه النهاردة
طارق: يا بابا ... سيبك منه ... ده واد بيهيس
الوالد: يعني ايه ... كلامه صح ولا غلط
طارق: يا بابا... ابنك ده دماغه مخرومه.... وعماله تنقط...متسمعلوش ولما يكلمك سد ودانك لحسن ياكلها....والودان اليومين دول غاليه يا بابا .. ملهاش قطع غيار
الوالد: يابني انت بتتكلم كده ليه ؟
طارق:يعني بكلمك بالسيم يعني.... بص يا بابا عشان خاطر ربنا...سيبني انام خمس ست ساعات علشان اقوم فايق...انا كنت سهران طول الليل .. يبني أأنتخ شويه
الوالد: تأنتخ؟ الله يخربيتك مش فاهم منك ولا كلمه لا انت ولا اخوك
طارق: والله يا بابا انا مأفور خالص ومش قادر... سيبني
الوالد: يابني كلمني زي ما بكلمك ايه اللي انت بتقوله ده ؟
طارق: يا بابا هو عشان انت صاحي بدري لازم انا كمان اصحي بدري سيبني يا بابا انا عارف مصلحتي
الوالد: مصلحتك؟ يابني انت بقالك تلات سنين في تانيه
طارق: ظلم يا بابا الدكاتره بتاعه الكليه حاطيني في دماغهم لحد ما عفنت
الوالد: ( وقد بدأ يتغاظ) طيب قوم يا معفن... خدلك دش وافطر و روح كليتك
طارق: بابا اقفل النور وخد الباب وراك ... وانا لما اقوم نبقي نشوف موضوع الدش ده
الوالد: (بصوت مرتفع) انت هتقوم ولا هقومك بالجذمه
طارقيجلس ع السرير) يا فتاح يا عليم ...الواحد لسه معملش استمورننج ع الصبح وبيتهزأ
يخرج الاب ويدخل اخوه وائل وطارق ينظر اليه شذرا
طارق: لازم تديها جاز ع الصبح.... شعللتها؟؟ .... ماااشي
وائل:هو اللي بيسألني
طارق:قوله معرفش..قوله معندوش زفت محاضرات
وائل: اكدب يعني ؟؟؟
طارقيضحك بسخريه) لا انت مبتعرفش تكدب... اقوله انك ساقط ومنجحتش زي ما قولتله وانك بتعيد السنه من غير ما يعرف
وائلوقد اصفر وجهه) لا يا طارق اوعي
طارق: طيب حلو ... روح هاتلي سيجارة من جيب ابوك اعمل بيها دماغ الصبحيه
وائليخرج سيجارتين من جيبه) خد ياعم سيجارتين اهم بس اخلص بسرعه قبل ما يجي
طارق: طيب يا اتم ... اخفي من قدامي دلوقت
يخرج وائل ويبدأ طارق في تدخين السيجارة وهو بعد ما زال ع السرير ثم ينظر يجواره ع الكمودينو ويتناول التليفون ويتصل بأحد زملائه
طارق: الو.. ايوة يا هيما ... انت لسه مكحول.. ما تقوم يا واد خليك نشيط
هيما:يابني حد يتصل بحد دلوقتي مفيش ذوق.. الساعه لسه عشرة ونص
طارق:فوق بقي.. ايه النظام؟؟ الحياه اخبارها ايه النهاردة؟؟؟
هيما: زي امبارح .. نروح المول...ندخل الكافي شوب...نطلب شيشه...نشرب لنا كام ستون...نعلق بنتين حلوين ... او نلف نعاكسلنا بنتين كويسين
طارق: طيب نتقابل الساعه واحده... متحلقليش
هيما: هتعمل ايه دلوقت؟؟
طارق:انا هخلع من البيت دلوقتي واخرج اصيع لحد ما نتقابل اصل ابويا عاملي فيها ابوالغضب والاشكيف ولو فضلت في البيت هيعملي فيها بروسلي ويضربني
هيما: الحمد لله ياعم ... ابويا ميت
طارق: يا بختك.... استكانيس براحتك... طول عمرك محظوظ.. شاو
يغلق الخط ويدخل اخوه وائل
وائل: اوعي يا طارق تقول لابوك... احسن يرحلني
طارق(ينظر اليه متعال وكأنه ملك روحه): خليك معايا حلو احسنلك.. احسن انا لساني بياكلني والنداله بتنقح عليا
وائل (باستجداء) اوعي يا طارق
طارق: طب روح هاتلي الجل بتاعك.. عشان الجل بتاعي بياكل في دماغي زي النار
وائل:احنا هنبدأ استغلال... وبعدين انت مبتغسلش دماغك لحد ما باظت
طارق:خلص ياعم االامور ... روح هاتلي الجل... انجز
وائل:ياطارق ما انت عندك ازازة لسه مفتحتهاش
طارق: يا واد روح متبقاش ايحه.. وبعدين انت لابس فانله في البرد ده عاملي فيها هركليز
وائل(يصرخ وهو يجري خارج الحجرة) يانهار اسود...ده المكوة ع القميص
يأخد وائل نفس من السيجارة وقبل ان يخرجه يدخل الوالد
الوالد: انت لسه نايم ؟
طارق(لا يرد حتي لا يخرج الدخان من فمه فيراه ابوه ويخفي السيجارة تحت البطانيه)
الوالد: يعني مش عايز تجيبها لبر ... ادي اخرة دلع امك فيك ...هي اللي فسدتك.. لو مخرجتش من البيت ورحت الكليه هكسر دماغك دي ... انت فاهم؟؟؟؟؟
طارق( ينظر الي والده وقد احمرت عيناه وانتفج وجهه)
الوالد: انت بتبصلي كده ليه ياواد انت... جاتك البلا في منظرك
ويخرج الوالد
طارق( يخرج نفسه الذي كتمه حتي كاد ان يموته ويسعل بشده)
وائل: ايه مالك؟؟ انت هتفطس ولا ايه ؟؟؟
طارق: روح هاتلي كبايه ميه ابوك كان هيموتني... كنت هسافر
يخرج وائل فيستلقي طارق ع السرير ويسترجع انفاسه ويغمض عينه.. وبعد قليل يرتفع صوت شخيره

كده الحلقه االاولي انتهت
وان شاء الله لو لقيتها عجبتكم هنزل كل يوم حلقه.....

مرسي ع الموضوع يا قمر


وفي انتضار الحلقة

*** الحلقه الثانيه ***

الساعه تجاوزت الثانيه عشر ظهرا
الاب جالس ف حجرة المعيشه يقرأ الجريدة والام ف المطبخ تعد الشاي..... طارق يخرج من حجرته يرتدي بنطلون جينز ساقط من ع وسطه بطريقه فجه تثير الاشمئزاز ويلبس قميص يلتصق بجسده بشده ويفتح 3 ازرار مبين سلسله كبيرة تنتهي بقطه فضيه ع شكل جمجمه وشعره مرفوع من الجانين الي الوسط ع شكل هرم ويلمع لمعانا شديدا بسبب الجل وحذائه لونه اصفر بكعب عال ويمسك في يده الموبيل والسماعات في اذنه ةيشغل عليه اغنيه اجنبيه لا يفهم معاني كلمتها ويبس نظارة عريضه جدا ع عينه لونها بني وفي يده ساعه شديده الضخامه وفي يده الاخري حظاظه نحاسيه عريضه.........
الوالد حين يراه: لسه خارج ... بقالك ساعتين بتتذوق؟
طارق(يغمغم): اف. اصطبحنا بقي
يدخل طارق الي امه الطيبه المطبخ التي تعد الشاي
طارق: ايه يا حاجه
الام:لسه صاحي؟....ابوك عمال ينفخ برة
طارق(بضيق): ماهو اللي مصحيني بدري
الام: بيصحيك علشان تروح الكليه
طارق:هو يوم الاجازة بتاعته كده.. لازم ينكد علينا
الام: وطي صوتك عيب
طارق:طيب انجزي بقي ..... هاتي المصلحه اللي قولتلك عليها امبارح
الام: مصلحه ايه ؟
طارق:ايه ياماما انتي نسيتي ولا ايه ؟؟ الاربعين جنيه بتوع الكتاب
الام: ياواد بطل كدب كتاب ايه اللي هتشتريه ب 40 جنيه
طارق:جري ايه يا ماما هو احنا لسه هنتكلم في الموضوع ده تاني مش انتي قولتيلي امبارح ماشي
الام: انا قولت هقول لابوك
طارق: يادي النيله.. انتي لسه هتقوليله
الوالد من الخارج ينادي ع الام ايه ياام طارق انتي بتعملي الشاي ع الشمعه ولا ايه
الام:حاضر جايه اهه
طارق (يمسك بذراع امه): بقولك ايه يا ماما الكتاب ده مهم.. متصيعوش مستقبلي.. حاولي تقصيهم من بابا بسرعه علشان الحق المحاضرة بتاعتي
يخرجان من المطبخ الي غرفه المعيشه حيث الاب ما زال جالسا يقرأ الجريدة فتضع الام الكوب امامه وتجلس وطارق يقف امامهم
ينظر الاب الي طارق بقرف ثم ينظرمرة اخري للجريدة وطارق يطأطئ بضيق ويهمز الي امه ان تكلمه
الام:بقولك ايه يا ابو طارق
الوالد: خير
الام:طارق كان عاوز فلوس يشتري بيهم كتاب
الوالد ينزل الجريده وينظر لطارق من فوق لتحت كتاب ايه اللي عاوز تشتريه انت مش اشتريت كل الكتب
طارق: كتاب التكاليف
الوالد:طب ما انت عندك كتاب التكاليف
طارق: يا بابا ده بتاع السنه اللي فاتت.... والمنهج اتغير
الوالد:وبكام الكتاب ده ان شاء الله ؟
طارق: ب 40 جنيه
الوالد(صارخا): كاااام ...... ب 40 جنيه ليه؟؟؟؟؟
طارق: وانا مالي يا بابا الكليه اسعارها غاليه
الوالد: واجيلك40 جنيه منين ان شاء الله احنا اخر الشهر
طارق: اعمل ايه يا بابا.. اسقط يعني؟؟
الوالد: لا العفو وانت وش كده
طارق: ايوة سمعني الكلام بتاعك بقي كل ما اجي اطلب منك فلوس
الوالد:40 جنيه ف كتاب كتير... صوره... اعمل زيي...عمري ما اشتريت كتاب
طارق: انت يا بابا دبلوم تجارة اصلا
الوالد: ولو عمري ما اشتريت كتاب
طارق: وبعدين الدكتور منزل معاه ملزمه يعني لازم نملاها ونرجعها تاني ومانع التصوير
الوالد: الله يخربيتك ع بيت الدكتور.... اجيبلك 40 جنيه منين دلوقت
طارق: امال مصحيني ليه...... ما كنت سيبتني نايم...هاروح الجامعه اعمل ايه دلوقت
الام( تحاول ان تهدي من الموضوع كالعادة):خلاص يا ابوطارق انا معايا 30 جنيه بتوع عدسه النضارة ياخدهم وانت اديله عليهم 10 جنيه كمان
الوالد: وده كلام؟؟ بقالك اربع شهور تاجلي في عمل العدسه.... اونتي عارفه انه مفيش كتاب ولا حاجه؟
طارق: والمصحف الشريف وعزة جلال الله في كتاب
يخرج الوالد من جيبه 10 جنيه ويعطيها ل طارق فيقترب منه طارق فيشم رائحه شعره
الوالد: ايه ده يابني انت حاطط ع شعرك سمنه ولا ايه ؟؟
طارق: سمنه ايه يا بابا ده الجل بتاع الواد وائل بس طلع حمضان
الوالد: مقرف انا عارف بيدخلوك الجامعه ازاي؟
طارق ايه يابابا انت كل ما تشوفني تطلع فيا القطط الفطسانه
الام: شباب يا ابو طارق...بكرة ربنا يهديهم
الوالد:ش شايفه لابس زي الرقاصه ازاي؟؟؟
طارق: هاتي يا ماما الفلوس خليني اخلص
الوالد: اسمع اول ما تيجي توريني الكتاب ابو 40 جنيه ده انت فاهم؟
طارق: يحييك ويحينا ربنا
ينظر اليه الاب في حين تضحك الام وتقوم لتحضر الباقي لطارق ويدخل بعدها وائل الذي منظره يشبه اخيه طارق ويذهب الي ابيه الذي امسك بكبايه الشاي وهم ان يشربها
وائل: بابا عاوز 40 جنيه اشتري بيهم كتاب
الوالد:.............................................

مسكين وائل الشاي كان سخن جداااا......




يارب تعجبكم......

الله عليكى يا جى جى
ايه الابداع ده كله يا قمر
تقبلى مرورى


اخوكى
فـــــــــــــــــارس

**** الحلقه الثالثه****

كان منزل (هيما ) صاحب (طارق ) على بعد شارعين من بيته ، لا تستغرق المسافة بينهما أكثر من عشر دقائق ، قطعها طارق فى ساعة إلا ربع ، لأنه قد وقف فى الطريق أكثر من مرة . فأى فتاة يراها يقف أمامها و يرفع صوت الأغانى على الموبايل لأقصى حد ، ليلفت إنتباهها إليه و إلى منظره المبهر الجذاب !! و لكن لم تعره واحدة منهن أى اهتمام إلا واحدة فقط نظرت إليه بقرف شديد فظن انها وقعت فى المصيدة فابتسم فى زهو و اقترب منها
طارق : صباحه عسل
الفتاة : نعم ... ؟!
طارق : أبداً .... أنا طارق
الفتاة : ( و هى تشير إلى قدمها ) و ده شبشب ... لو ما اتلميتش حاضربك بيه فى وسط الشارع
طارق : ليه كده .... دا أنا غرضى شريف
الفتاة : أمشى ياد من قدامى أحسن أهزأك
طارق : ( يشعر بالخطر فيتراجع ) ماشى ... بكرة تندم يا جميل
و مشى فى طريقة و قد نسى ما حدث بعد ثوان ، فهذا أمر قد اعتاده
و ظل كذلك حتى وصل إلى منزل ( هيما ) ووقف تحت العمارة و اتصل به ، ففتح عليه و رد .
طارق ( فى ضيق شديد ) : بتفتح عليه ليه يا إتم ؟ عاجبك كده ؟ ... دى كانت آخر رنة
هيما : معلش غصب عنى .... حبيت أكنسل قمت رديت
طارق : طيب اخلص .... انزل بسرعة
هيما : ثوانى
بعد ربع ساعة ينزل ( هيما ) و شكله لا يختلف عن طارق إلا أن شعره شديد الخشونه شديد الضخامة يصنع به كرة كبيرة على رأسه و له لحية صغيرة تحيط بفمه على شكل ***وكة
طارق : إيه يا عم بتعمل إيه ده كله ؟
هيما : معلش ... أصلى جالى تليفون
طارق : مين ؟
هيما : البت اللى قلتلك عليها
طارق : كلمتك ؟
هيما : يا بنى دى زهتقنى تليفونات ..... دى بتكلمنى على الموبايل بالخمس ساعات كل يوم
طارق : ياه ... دى أكيد غنية
هيما : يا بنى أبوها سفير .... يعنى بيقبض فى الشهر أكثر من ستة مليون جنيه!!!
طارق : يا نهار اسود .... دا أنا أبويا لما بقوله عاوز عشرة جنيه بيعمل استبدال معاش
هيما : يا بنى دى مغرقانى هدايا .... لسة امبارح جايبالى دبدوب قدك كده
طارق : دبدوب ؟!! كانت جابتلك قميص بدل القميص الجربان اللى انت لابسه ده و مبتغيروش
هيما : يا بنى أنا اللى بحب ألبسه ... بقولك معاكش فلوس ؟!
طارق : ليه ؟ احنا متفقين ... العملية صايمة .... كل واحد شايل نفسه
هيما : متبقاش ندل .... أنا قشفور .... و بعدين إحنا رايحين مكان كله بنات.... متكسفناش
طارق : يا بنى بنات إيه ؟.... أنا حصلى تشبع منهم
هيما : يا واد يا لورد ... إلا ما شفت معاك معزة حتى
طارق : مش مصدق ..؟! طيب دا أنا لسة معلق واحدة قبل أما جيلك و أخدت نمرتها كمان
هيما : ما أنا واخد بالى ... المهم معاك كام
طارق : معايا أربعين جنيه
هيما : قشطة ... مية مية .... يكفونا النهاردة
طارق : استنى شوية يا عم الحلو ... الفلوس دى حجيب بيهم كتاب .... و الباقى حاصرف منه لآخر الشهر
هيما : كتاب ؟ كتاب إيه يا بنى .... انت حتفشل و لا إيه ؟
طارق : أبويا ياعم .... قالى لازم أشوف الكتاب اللى حتشتريه ده .
هيما : دا أبوك ده عُقر قوى
طارق : يلا بينا بقى نروح الجامعة نستقضى أى كتاب عشان أخش عليه بيه ، و الباقى نشوف حنعمل بيه إيه
هيما : جامعة إيه يا عم ... ما انت عارف أنا مطلعتش الكارنيه
طارق : أدخل بالوصل
هيما : وصل إيه يا بنى .... هو أنا دفعت حاجة ؟ ... ما انت عارف ...الربعمية جنيه بتوع المصاريف رحت بيهم الرحلة
طارق : وحتعمل إيه ؟
هيما : مش عارف ... ممكن أبيع الموبايل
طارق : موبايل إيه ؟ يا بنى .... الموبايل بتاعك ده ممكن تقايض بيه على شبشب بلاستيك
هيما : أهو يجيب حوالى 200 جنيه و الباقى أحاول اتصرف فيهم
طارق : حتتصرف ازاى يعنى ؟
هيما : ما أنا قلت لك ... الواد (كُتْلَة ) شغال أمن فى المول ، كلمته امبارح و قال لى إنه حيودينى الشركة اللى شغلته
طارق : طيب ما تكلمه على أنا كمان
هيما : أما أشوف نفسى الأول أبقى أشوفك
طارق : ماشى ... بس خليها فى جمجمتك ....يلا بقى نروح النيلة الكلية
هيما : يلا يا برنس
طارق : تعالى نركب الميكروباص
هيما : ما تيجى يا عم الغنى نركب الأتوبيس و نزوغ زى كل يوم .... و لا انت خلاص.....الاربعين جنيه نسوك أصلك
طارق : يلا يا صديق السوء
يذهبان إلى محطة الأتوبيس ، و ينتظران أتوبيس الجامعة حتى يأتى فيجدانه مزدحماً فيسران لذلك لسهولة التهرب من الكمسارى
فيركبان و فعلاً يزوغان منه و يذهبان إلى وسط الأتوبيس و يقفا وراء فتاة فتلتفت إلى (طارق) و تبتسم له ، فيكاد طارق ينبت له جناحان من الفرحة ... أخيراً وجد فتاة تأبه له ، فيشاهد ذلك ( هيما ) فيكاد ينبت له قرنان من الغيرة ... و يحاول أن يتقدم فيقف هو إلى جوارها فيمنعه (طارق) بذراعه
طارق : إيه ... رايح فين ... مفيش مكان
هيما : كده ... حتبيع أخوك من أولها
طارق : و لا أعرفك
هيما : ماشى يا عم ... و زوغنا كمان ... ماشية معاك حلاوة
يهمله طارق تماماً و يلتفت إلى الفتاة الشيك و يسأل نفسه : لماذا تركب مثلها هذا الأتوبيس المزدحم .
أخذ طارق يحاول أن يبدأ معها حوار ، فلم يستطع ، فالتفتت هى إليه
الفتاة : الدنيا حر قوى
طارق : آه .... الواحد عرقان خالص
الفتاة : مش عارفة الأتوبيس حيكون فاضى امتى
طارق : حيكون فاضى بعد ما الناس تنزل .....ها ها ها ها ها ( و يضحك بصوت عال )
الفتاة : ( تبتسم ) انت رايح الجامعة ؟
طارق : أيوة
الفتاة : فى كلية إيه ؟
طارق : تجارة ... و انتي
الفتاة : أنا فى الجامعة الأمريكية
طارق : اللى فى التحرير
الفتاة : آه
طارق : أهلا و سهلاً
الفتاة : ده زميلك ؟
هيما : ( يبتسم و يمد يده ليسلم عليها ) : آه أنا زميله
الفتاة : ( تسلم عليه و هى تبتسم ) : أهلا و سهلاً
طارق : ( يشعر بالغيرة الشديدة) يلا يا خويا عشان هننزل المحطة الجاية
فى هذه اللحظة يفرمل الأتوبيس فرملة شديدة فتميل الفتاة على طارق و تستند عليه فيشم منها رائحة عطر أصابته فى مقتل
الفتاة : أنا آسفة
طارق : ( يكاد يغمى عليه ) لا ... خالص ... مفيش حاجة
هيما : يلا ... المحطة قربت
يودعها طارق بابتسامة عريضة و تودعه بمثلها ، ثم ينزلان من الأتوبيس و طارق فى حالة يرثى لها من الوله و التوهان
هيما : مالك ... انت سافرت و لا إيه
طارق : شفتها و هى بتضحكلى ؟
هيما : يا بنى دى تعبانة خالص .... أما لو شفت البت بتاعتى ...
طارق : مش عارف يا أخى... الأتوبيس كل يوم يوصلنا فى ساعة كاملة .... النهارة الطريق ماشى فريرة
هيما : أصل انت نحس يابنى
طارق : ملحقتش حتى أعرف اسمها
هيما : يا عم خلص بقى .... يلا نملى التنك الأول قبل ما نروح الهبابة ، لحسن أنا كلتش من الأسبوع اللى فات
طارق : ماشى يا عم و أنا عازمك
هيما : إيه يا عم الكرم اللى نزل عليك مرة واحدة ده
طارق : أى خدمة بس متاخدش على كدة ..... تعالى نروح عند فجر الإسلام بتاع الكشرى
هيما : متخليها كبدة النهاردة يا روقة
طارق : وله .... بقولك إيه ... لا حيبقى فيه كبدة و لا كشرى ... مش كفاية أنا متكفل بيك النهاردة
هيما : ذِل أهلى بقى عشان طبق كشرى حمضان
طارق : و جاى على نفسك ليه ؟ بلاش
هيما : خلاص يا عم ... اللى ييجى منك أحسن منك
يدخلان إلى محل الكشرى فيطلب (طارق ) طبق مخصوص له و يطلب لـ (هيما ) طبق عادى ،فينظر له (هيما) بغل
هيما : ماشى يا أندل
طارق : انت فاكرنى نسيت و لا إيه .... انتم السابقون
هيما : مردودالك
طارق : بس يا فقير يا معفن
يأكلان و يشبعان و تمتلئ بطونهما ، و يظل طارق يتكلم عن تلك الفتاة و كأنها فتاة أحلامه
و أخيراً يأتى الجرسون ليطلب الحساب
طارق : الحساب كام ؟
الجرسون : أربعة جنيه يا بيه
يمد يده فى جيبه الخلفى ليخرج المحفظة ، فيصفر وجهه ....غير موجودة .... يدخل يده فى جيبه الثانى .... فيحمر وجهه ... غير موجودة
طارق : يا نهار اسود ... المحفظة وقعت منى
هيما : وقعت ولا اتسرقت
طارق : ( و كأنه انتبه إلى شيء ما ) البت بتاعة الأتوبيس .... باين هى اللى سرقتها ... يا بنت الحرامية
هيما : و بعدين ... حتعمل إيه
كل هذا و الجرسون واقف و كأن الأمر لا يعنيه ...
الجرسون : إيه يا بشوات ... فيه فلوس ولا لأ
هيما : الطبق العادى بكام
الجرسون : بجنيه و نصف
يمد هيما يده فى جيبه فيخرج جنيهاً و نصفاً فيدفعه إلى الجرسون
طارق : ( و هو يكاد يبكى ) : و بعدين يا (هيما)
هيما : أروح أندهلك أبوك ؟
طارق : أبويا إيه الله يخرب بيتك ... هى ناقصة؟
ثم ينظر إلى الجرسون فى استجداء ، فينظر إليه الجرسون فى لامبالاة
الجرسون : و بعدين
طارق : فيه تليفون هنا ؟
هيما : ما انت معاك الموبايل
طارق : ما انت فتحت على و كانت آخر مكالمة شايلها للرنات يا فالح
الجرسون : مفيش تليفون
طارق : طيب روح يا هيما اتصل بالواد (وحيد ) خليه ييجى يدفع
هيما : أنا معيش غير ربع جنيه حاروح بيه
طارق : ( يستعطف الجرسون الضخم غير المبالى ) بقول لحضرتك إيه ... إحنا زباين هنا
الجرسون : أنا أول مرة أشوفك
طارق : الفلوس اتسرقت و الله
الجرسون : ما ليش فيه
طارق : طيب و بعدين
الجرسون : هات الموبايل رهن و روح هات الفلوس
طارق : ده بخمسميت جنيه و فيه كاميرا
الجرسون : يبقى حتنضرب لما تتكسر و حتغسل المواعين و حتقشر بصل لحد ما يجيلك إمساك
ثم يذهب ليحاسب زبون آخر
هيما : طيب أنا حامشى بقى يا طارق عشان ألحق المحاضرات
طارق : محاضرات .... حتسيبنى كدة من غير ما تتصرف
هيما ( يميل عليه و يهمس له ) : خلاص بقى يا طارق ... دول قلمين و حيعدوا ... و بعدين ما احنا ياما اضربنا كتير قبل كدة
طارق : يا سلام .... انت مش شايف إيده قد إيه ... ده ممكن يفرطلى سنانى بقلم واحد ... القلم التانى ممكن يقلبنى واحدة
هيما : أقولك ..؟ إجري ... يلا هو مش واخد باله .... تعالى نجرى
طارق : ( و قد تجرأ قليلا) : طب يلا ...
فجأة يجرى هيما و يخرج من المحل ، و يجرى وراءه طارق فيصطدم بزبون داخل إلى المحل فيتعثر و يقع على الأرض ، فيجرى إليه الجرسون و يمسكه من قفاه ، و يدخل به إلى المحل

.............. الله يرحمك يا طارق وبكره نتقابل مع الحلقه الرابعه يا رب تعجبكم بس

من عنوووووووووني يا حسني باشا انت تؤمر بس يا برنس
بس يارب تعجبكم بقي كلهاااااااااا

***الحلقه الرابعه***
تررررررررررررن ........ تررررررررررررررررررن
جرس الباب يرن بطريقة متواصلة
تخرج الأم من حجرتها لتفتح الباب فتنظر فى العين السحرية فتنتفض من الخضة
و تجرى على زوجها فى البلكونة و هو يقرأ فى الجريدة
الأم : أبو طارق
الوالد : فيه إيه .... مالك ؟
الأم : الجرس ضرب .... بصيت من العين السحرية لقيت واحد أصلع وشعره منكوش من الجنبين ، و لا بس فانلة داخلية و شكله يخوف .
الوالد : (و قد بدأ يتوجس ) : استنى ما أشوف مين
الأم ( بخوف ) : خد بالك يا أبو طارق
الوالد : ينظر من العين السحرية فيجد أن الوصف صحيح
بتوتر يفتح الباب نصف فتحة و هو يتسائل
الوالد : مين ... ؟
فيرد عليه هذا الوافد الغريب : إيه بابا أنا طارق .... مش عارفنى ؟
الوالد : طارق ؟ .... إيه ده ؟ إيه اللى عمل فيك كده ؟
كان شكل طارق عجيباً .... يرتدى فانلة داخلية ممزقة على البنطلون ، و شعره محلوق من المنتصف فبدا كالأصلع
ترى الأم هذا المنظر فتضرب صدرها و تجرى على ولدها و تسأله ملهوفة
الأم : إيه يا طارق .... إيه اللى عمل فيك كده ؟
طارق : اتخانقت يا ماما
الوالد : اتخانقت إيه ؟ قول اتبهدلت .... قول اتشبحت
طارق : بابا الله يخليك ... أنا مش ناقص
الوالد : فيه إيه يا بنى .... إنت رحت القسم ؟
يدخل طارق و يجلس على كرسى فى غرفة المعيشة
طارق : قسم إيه بس يابابا ... ؟
الوالد : أمال إيه اللى حصل ؟
طارق : حاقولك بس سيبنى آخد نفسى .... أنا عمال أجرى بقالى ساعة
الأم : يا حبيبى يا بنى
طارق : هاتيلى كباية مية يا ماما
تجرى الأم على المطبخ و يجلس الوالد على الكرسى المجاور لطارق ينظر إليه بقلق ، و طارق مرجع رأسه و مسندها على الكرسى و مغمض عينه فى إرهاق
تأتى الأم بكوب الماء فيجرعه طارق فى لهفة
ثم يضع وجهه بين كفيه و يبكى
طارق : حلقولى شعرى يابابا .... عمال أربى فيه بقالى سنة
فتبكى الأم من منظر ولدها و يرق قلب الأب له
الوالد : إيه اللى حصل يابنى ؟
طارق : و الفلوس اتسرقت منى
الأم : ولا يهمك يا حبيبى ... المهم انت كويس
الوالد : يا بنى قولى إيه اللى حصل .... طمنى
طارق : رحت أفطر فى محل كشرى جنب الجامعة و لما جيت أحاسب لقيت الفلوس اتسرقت منى فضربونى و حلقوا شعرى
الوالد : وما اتصلتش بينا ليه ؟
طارق : حاولت معرفتش .... يا ريتهم كانوا موتونى و ما حلقوش شعرى .... حاخرج تانى إزاى كده
يبكى طارق بحرقة و هو يخفى وجهه بين يديه ، فتركع الأم أمامه و تأخذه فى حضنها و تبكى معه
الوالد يطرق و قد عقد ما بين حاجبية بشدة و بان عليه القلق الشديد
الوالد : تعالى يا طارق ... عاوزك فى حاجة
ثم ينظر إلى الأم نظرة ذات مغزى و يقول لها
الوالد : خليك انت يا فتحية
ثم يدخل الحجرة و طارق وراءه فيدخل و يغلق الباب وراءه
الوالد : هو ده اللى حصل يا طارق ؟
طارق : آه والله يا بابا
الوالد : مفيش حاجة حصلت تانى ؟
طارق : لا والله يابا
ربنا يستر .... قوم يلا خد لك دُش .... و انزل روح للحلاق يصلحلك شعرك ، و بالليل نكمل كلامنا الوالد:
يخرج الأب و بعد قليل تدخل الأم و معها كوب حلبة
الأم : خد يا حبيبى اشرب شوية حلبة ... تهديك شوية
ياخذ طارق الكوب فى انكسار و قد كسا الحزن وجهه ، فتقترب منه الأم و تحاول أن تخفف عنه
الأم : معلش يا طارق ... حصل خير يا بنى
طارق : الفلوس اتسرقت يا ماما .... حجيب الكتاب منين ؟
الأم : ( و هى تبتسم ) : يا واد بطل كدب .... مش كفاية اللى جرالك ؟
طارق : انتي برضه مش مصدقانى يا ماما ؟
الأم : لأ مصدقاك ... و حتفرج إن شاء الله
طارق : منين بس ؟
الأم : خالك (كرم) راجع النهاردة من السعودية .... و حيدينى فلوس كتير .... متقلقش
طارق : بجد يا ماما ؟ خالى راجع النهاردة .... ده وحشنى قوى ... يارب يكون جابلى الموبايل اللى وعدنى بيه
فى هذه اللحظة يفتح (وائل ) الباب و قد عاد من جامعته .... فلما رأى منظر (طارق) ينفجر ضاحاً حتى سقط على الأرض ، و (طارق ) ينظر له بغيظ شديد ، و الأم تحاول أن تسكت (وائل) و هو يكاد يغشى عليه الضحك
وائل : (و هو ما زال يضحك) إيه يا عم النيو لوك الجديد ده ؟ .....ها ها ها ها
طارق : ماشى يا خفة
وائل : ( و هو يقهقه ) و عامل شعرك كده ليه زى القرموطى ... ؟ هو هو هو هو
طارق : بقولك إيه ... أنا مش ناقص خفة دمك دى ..... خديه بره يا ماما علشان ما أزعلوش
وائل : عشان تبقى تفترى و تاخد الجل بتاعى ... ربنا ما يسيبش حق حد أبداً ..... هى هى هى هى
طارق : يا بنى ابعد عنى الساعة دى أحسنلك .... أنا العفاريت بتنطط فى وشى
الأم : بس بقى يا وائل أخوك متضايق
وائل : عامله له حلبة يا ماما .... هو حامل و لا إيه ؟ ها ها ها ها
الأم : يا بنى اسكت عيب أخوك تعبان
وائل : ولد و لا بنت إن شاء الله ؟ ها ها ها ها
طارق : كده ... ؟ طيب
ثم يصرخ بأعلى صوته منادياً والده الذى يأتى بسرعة
طارق : بابا .... وائل لسة فى سنة أولى ... و سقط و بيضحك عليك و فهمك إن هو نجح
وائل يبلع ضحكه و ينظر إلى والده فى رعب ، و تضرب الأم صدرها بيدها و ينظر طارق إلى وائل بتشف
فى حين أن الصدمة ترج كيان الوالد المسكين فينظر إلى (وائل) و الشرر يتطاير من عينه ، فيذهب طارق ليحتمى بأمه و هو يكاد أن يغمى عليه من الرعب
وائل : حا فهمك يا بابا
الوالد : تفهمنى إيه يا كلب ؟ تفهمنى إنك بتضحك على و بتغشنى بقالك سنة ؟
وائل : يا بابا استنى .... حاقولك
الوالد : ده أنا حخليك عبرة
ثم يخلع حزامه و يحذب الأم وراءه ، و يبدو أنه سيبدأ فى عزف انفرادى على جميع الآلات المتوفرة على جسد ( وائل)

..............
أرى أنه لا داعى لوجودنا الآن ... هذه مسألة عائلية
ونتقابل بكره في الحلقه الخامسه عشان طارق هيروح يشتغل في الامن ونشوف هيحصل ايه ليه ولاصحابه بس يارب تعجبكم